Mein gumaan ka qail nahee kio k mera yaqeen hameesha gumaan per hawi raha

yoon mein nay ahsaas say wajood ko moujood paya aur moujood ko yaqeen ki soorat upnay qareeb mehsoos kia

Who saamnay nahee aya magar door bhee nahee gaya

bola nahee magar sunta raha, dikha nahee magar ahsaas kerata raha

Mein terpa to ussay pukara roya toe ansooe bhayaya

Tukleef ko jawaaz banaya aur shikway ko ibadat yoon derd mein jub cheekha sajda zer uss ki hee bargah mein raha

Ajab zaat hai perwerdegar jisay dekha nahee suna nahee jana nahee magar phir bhee yaqeen kamil eman ki soorat aur eman yaqeen ki soorat uss ki wahdaniyat

Uss kay wajood ko mujood say jaana aur moujood ko uss kay paygham say yoon wahee ko ilm kay saanchey mein tola aur kalaam ko zuban ki sheerni mein tatola

Aaj phir say who bohut yaad aya ,khoob roya subhla toe phir derwaza khutkhataya yoon phir shikwa mera kalaam bana aur merham meri dawa

Aaj Aik baar phir uss nay arzo ko umeedo say huta ker tukmeel ki manzil dey dali yoon karam say pashayman kerdala mujh ko

Baat sirf itnee hai k tukleef mein jis shiddat say derd hua kerta hai dawa bhee uss tezi say mila kerty hai

Uss ki qurbat nay meray wajood ko saroor aur saroor ko gharoor mein mubtila kerdea hai yoon mein muflisi mein bhee khud ko badsha aur uss ki ata ko upnee sultanat tasswer kia kerta hoo (Dr Raza)